Bellit.info сабраў спіс новых выпускаў літаратурных і кніжных падкастаў. Перадусім гаворка пра падкасты “Спіс на лета”, “Кніжныя размовы”, Bellit Насты Карнацкай і інклюзіўную перадачу ад Музея Максіма Багдановіча.
Распачаў другі сезон падкаст “Спіс на лета”. У першым выпуску выкладчыца і філалагіня Марына Казлоўская і паэтка і арт-менеджэрка Дар’я Бялькевіч размаўляюць пра жыццё і творчасць паэта і перакладчыка Уладзіміра Дубоўкі. А новы выпуск прысвечаны Міхасю Зарэцкаму — ці не самаму папулярнаму пісьменніку 1920-х гадоў.
“У ягонай прозе пагрозлівы горад, цягнікі, бары і бардэлі, рызыкоўныя героі і моцныя гераіні, якія не заўсёды даюць рады наступствам сваіх выбараў, а таксама дзівосная паэма пра каханне, што цягне на дно. Зарэцкі фіксуе нараджэнне «новага чалавека», атамізацыю грамадства, эмансіпацыю і рэвалюцыю побыту, назірае, як змяняюцца жанчыны, і спрабуе зразумець, што адбываецца з беларусамі ў раннім БССР і куды гэта іх прывядзе”, — гаворыцца ў анонсе да выпуска.
Падкаст дасяжны для праслухоўвання на YouTube, Apple Podcasts, Yandex Music, Spotify, Castbox, а таксама на сайце Wir.by.
Кніжная блогерка Кацярына, з якой на нашым сайце нядаўна выходзіла інтэрв’ю, працягвае рабіць падкаст “Кніжныя размовы”. У ім Кацярына расказвае пра дзіцячую, падлеткавую і дарослую літаратуру, якую вы можаце прачыцаць ці паслухаць па-беларуску.
Выйшаў ужо 21 выпуск. Cлухаць падкаст можна на Apple Podcasts, Spotify, Castbox, YouTube і іншых стрымінгах.
Працягвае выходзіць хіба самы стабільны беларускі кніжны падкаст Bellit, які робіць блогерка і перакладчыца Наста Карнацкая.
Цяпер выйшлі выпускі нумар 176 і 177, у якіх гаворка ідзе пра венгерскага інтэлектуала, які завіс ва ўласным жыцці, пра жыццё гаспадароў сабак, пра раман лаўрэата Букераўскай прэміі 2025 году, а таксама літаратурныя навіны кастрычніка. Выпускі падкасту таксама дасяжныя на ўсіх лічбавых пляцоўках, а ўнікальны кантэнт даступны па падпісцы на Patreon.
Музей Максіма Багдановіча працягвае выпускаць цыкл перадач да 135-годдзя з нараджэння паэта. Інклюзіўны праект, які выходзіць у супрацы з Беларускім таварыствам інвалідаў па зроку, называецца “Топ-12 музейных прадметаў”.
У фармаце падкаста на YouTube супрацоўнікі музея штомесяц расказваюць пра самыя цікавыя экспанаты музея. Надоечы выйшаў выпуск нумар 10, прысвечаны куфару, які належаў дзяўчыне, у якую быў закаханы Максім Багдановіч.
Сярод іншага хацелася б звярнуць увагу на цікавыя перадачы ад Літрадыё. Няхай ужо нейкі час новыя выпускі не з’яўляюцца, але архіў размоў з пісьменнікмі і не толькі, створаны аўтарамі падкастаў, уражвае. Рэкамендуем да праслухоўвання падкасты: “Каля літаратуры”, “Адкуль бяруцца кнігі” і “Супердудко”.
Таксама на сайце Літрадыё цяпер вядзецца жывы эфір, дзе можна пачуць аўтарскае чытанне вершаў і прозы, беларускую андэрграўндную музыку, прамыя ўключэнні з літаратурных сустрэч і фестываляў і многае іншае. Сачыць за раскладам можна праз тг-канал litradio_link.
Не забывайма таксама пра аўтарскі падкаст Сяргея Дубаўца “Літаратурныя зацемкі”, які працягвае выходзіць на нашым сайце Bellit.info.
