У межах праекта KRAINA Media Sandbox “Будзьма” стварыла комікс пра адну са старонак жыцця грамадска-палітычнага дзеяча, гісторыка і пісьменніка Вацлава Ластоўскага. Комікс апавядае пра паездку Ластоўскага на Акадэмічную канферэнцыю па рэформе беларускага правапісу ўвосень 1926 года.
У лістападзе 1926 года ў Мінску адбылася знакавая падзея — Акадэмічная канферэнцыя па рэформе беларускага правапісу, якая сабрала мовазнаўцаў не толькі з БССР (такіх як Я. Лёсік, С. Некрашэвіч, М. Байкоў, П. Бузук, У. Ігнатоўскі, І. Воўк-Левановіч і інш), але і з замежжа. Сярод іншага Макс Фасмер з Берлінскага ўніверсітэта, Юзаф Галомбак з Варшаўскага ўніверсітэта, паэт Ян Райніс з Латвіі і г.д.
У БССР поўным ходам ішла “беларусізацыі”: выходзілі кнігі, газеты і часопісы на беларускай мове, працавалі музеі і тэатры, здымалася кіно, разбудоўвалася сістэма адукацыі. Паездка Вацлава Ластоўскага ў савецкі Менск менавіта ў гэты перыяд у значнай ступені паўплывала на ягонае рашэнне пазней пераехаць у БССР. Рашэнне, якое стала ў выніку фатальным.
