У выдавецтве “Пфляўмбаўм” пабачыў свет зборнік эсэ Ханны Арэнт “Пра чалавечнасць у цёмныя часы”, укладзены Мары Луізэ Кнот. Навінка ўжо прадаецца на Віленскім кніжным кірмашы (стэнд выдавецтва — 5.A10), пазней з’явіцца ў іншых месцах продажу.
Перакладалі эсэ Алена Пятровіч, Вольга Гронская, Алена Талапіла, Кацярына Тэвес. Рэдактарка — Кацярына Маціеўская.
Гэта кніга пачалася з пытання, зададзенага беларускай пісьменніцай Святланай Алексіевіч вядомай нямецкай экспертцы па інтэлектуальнай спадчыне Арэнт Мары Луізэ Кнот на фестывалі міжнароднай літаратуры ў Кёльне ў 2022-м. “Ці можаце вы мне сказаць, што Ханна Арэнт думала пра калектыўную віну, ці існуе нямецкая віна?” — спытала Алексіевіч. Яе цікавіў панятак “арганізаванай віны”, то бок той факт, што нацысты зрабілі немцаў суаўтарамі злачынства ці пасіўнымі суўдзельнікамі.
Паколькі магчымасці падрабязна абмеркаваць гэтае пытанне ў іх не было, Святлана Алексіевіч прапанавала Мары Луізэ Кнот ўкласці кнігу эсэ Арэнт для выдання ў выдавецтве “Пфляўмбаўм”. Вынік — першая кніга знакамітай мысляркі па-беларуску.
Прапануем азнаёміцца са зместам кнігі:
- ШТО ЗАСТАЕЦЦА?ЗАСТАЕЦЦА РОДНАЯ МОВА
Размова Гюнтэра Гаўса з Ханнай Арэнт - АРГАНІЗАВАНАЯ ВІНА
- ПЕРСАНАЛЬНАЯ АДКАЗНАСЦЬ
ВА ЎМОВАХ ДЫКТАТУРЫ - КАЛЕКТЫЎНАЯ АДКАЗНАСЦЬ
- УВОДЗІНЫ Ў ПАЛІТЫКУ
- РАЗУМЕННЕ І ПАЛІТЫКА
- МЫСЛЕННЕ І МАРАЛЬНЫЯ ПЕРАКАНАННІ
- ДУМКІ ВАКОЛ ЛЕСІНГА
Пра чалавечнасць у цёмныя часы - ПАСЛЯМОВА ЎКЛАДАЛЬНІЦЫ МАРЫ ЛУІЗЭ КНОТ
У пошуках падмуркаў для новай палітычнай маралі
Выданне стала магчымым пры падтрымцы Goethe-Institut.
