Выдавецтва “Янушкевіч” абвясціла пра пачатак продажаў беларускага перакладу найноўшага рамана вядомага польскага пісьменніка Шчэпана Твардаха “Нуль”. Пераклад на беларускую здзейсніла Кацярына Маціеўская.
Каніга ўжо даступная для чытачоў у кнігарні “Кнігаўка” ў Варшаве, а таксама навінку можна замовіць праз сайт з дастаўкай у многія краіны свету Knihauka.com.
“Нуль” — гэта выбуховая сумесь ваеннай драмы, псіхалагічнага трылера і філасофскай рэфлексіі пра сутнасць чалавека на вайне. Гэта сучасная ваенная проза, якая разрывае традыцыйныя схемы гераізму і ахвярнасці, уласцівыя савецкаму канону. Твардах паказвае вайну не як эпас пра перамогу, а як хаос, у якім разбураецца чалавечая мараль, і застаецца толькі воля да выжывання.
Калі Шчэпан Твардах адправіўся на ўкраінскі фронт, каб адчуць усё на ўласнай шкуры, з’явілася мноства каментарыяў пра тое, што гэта безадказна, небяспечна і пазёрства, але ў выніку атрымалася моцная кніга.
“Нуль” адначасова адрозніваецца і вельмі падобны да іншых кніг Твардаха. Нягледзячы на раманную форму, у якой напісана гісторыя Каня, добраахвотніка УСУ (Узброеных сіл Украіны) з нямецка-ўкраінска-польскімі каранямі, — кніга часам нагадвае рэпартаж. Твардах апісвае гісторыі, эмоцыі і падзеі, якія ён сам перажыў або пачуў ад жаўнераў.
Твардах выбірае фікшн, выдумку, каб расказаць праўду. У пэўным сэнсе гэта нават дазваляе яму быць больш адкрытым — літаратура факту ва ўмовах вайны патрабуе, напрыклад, гарантыі бяспекі апісаных персанажаў. Выбіраючы мастацкую літаратуру, заснаваную на рэальных падзеях, аўтар можа больш дакладна апісаць рэальнасць.
“Нуль” — гэта шматгранная проза, напісаная жывой мовай. Кніга пра тое, наколькі прыземлена бязглуздай і ў той жа час бязглузда бескампраміснай можа быць вайна.
Беларускі пераклад зрабіла Кацярына Маціеўская, лаўрэатка Прэміі Шэрмана, якая перадала складаную, шматпластавую мову Твардаха з яе гіпнатычнай энэргетыкай і трывожным рытмам.
Шчэпан Твардах — знаны сучасны польскі пісьменнік. Бескампрамісны ў публічнай дзейнасці. Рэзкі ў палітычных выказваннях. Кожная выдадзеная ім кніга станавілася падзеяй і абавязкова — бэстэлерам. У аўтарскім даробку ёсць шэраг вядомых, скандальных і гучных раманаў: “Морфій” (2012), “Драх” (2014), “Кароль” (2016), “Каралеўства” (2018), “Пакора” (2020), “Холад” (2022). Ягоная самая прадаваная кніга “Кароль” выйшаў па-беларуску ў 2022 годзе.
