Выдавецтва “Янушкевіч” адкрыла папярэдні заказ на трэцюю кнігу з дзіцячай серыі аўтарства Ганны Янкуты. Новая частка называецца “Кот Шпрот і вежавы гадзіннік”. Старт продажаў у “Кнігаўцы” запланаваны на 26 ліпеня. На папярэднім заказе дзейнічае зніжка 10 %.
Насамрэч, кніга “Кот Шпрот і вежавы гадзіннік” была напісаная аўтаркай яшчэ тры гады назад, але толькі зараз выходзіць на паперы, у тым ліку дзякуючы падтрымцы чытачоў. Раней існавала толькі аўдыяверсія ад ініцыятывы “Кніжны Воз”.
![](https://bellit.info/wp-content/uploads/2024/07/451324454_996805932452014_4950340643380202607_n-968x1024.jpg)
Вобраз Ката Шпрота ў трэцяй частцы ўсё так жа належыць пэндзлю ілюстратаркі папярэдніх частак — Ліліі Давыдоўскай.
З анатацыі:
У ваколіцах завулка Калініна дзеецца нешта незразумелае. Чаму Алесь не паспявае выканаць на кантрольнай усе заданні? Хто зламаў любімы зэдлік Жан-Жаха? І чаму ў горадзе пахне грыбамі? Калі загадак робіцца занадта шмат, кату Шпроту і яго сябрам, прывідам Мары, Жан-Жаху і Зязюлі, застаецца толькі адно – выправіцца на пошукі разгадак. І яны прыводзяць іх да вежы гадзіннікавага завода.
![](https://bellit.info/wp-content/uploads/2024/07/394568078_2972531646212587_2818156034286331269_n.jpg)
Замовіць трэцюю кнігу можна праз сайт выдавецтва “Янушкевіч”. Таксама можна папярэдне замовіць і набыць увесь камплект з трох кніг пра Ката Шпрота.
Выдавец папярэджвае, што пад папярэдні заказ будуць афармляцца толькі адразу аплачаныя заказы праз інтэрнэт. Заказы пад самавываз і аплату ў кнігарні будуць анулёўвацца.