Міжнародны саюз беларускіх пісьменнікаў працягвае дзяліцца “Казкамі на вакацыі” паводле твораў Уладзіміра Дубоўкі. Чацвёрты анімацыйны фільм у падарунак школьнікам і іхным бацькам ўжо можна глядзець на YouTube.
“Чаму сава пяе ўначы, а ўдзень маўчыць” — гэта гісторыя пра Дзятла і Саву, якую вершам расказаў паэт Уладзімір Дубоўка. Саве добра дастаецца ад людзей (“xтo кaмeнь кiнe…”, “хто па гарбу дае…”), бо ім недаспадобы ейныя спевы, таму гераіня казкі адважваецца пакінуць родныя мясціны і выпраўляецца шукаць іншы лес. Але яе спыняе Дзяцел, які спрабуе вырашыць праблему і дапамагчы суседцы.
Тэкст чытае музыка і паэт Алесь Камоцкі. Анімацыю рэалізаваў мастак і музыка Андрусь Такінданг.
Класік беларускай паэзіі Уладзімір Дубоўка быў адным з найвядомейшых і ўлюбёнейшых паэтаў у 1920-я гады. Стваральнік і адзін з кіраўнікоў згуртавання “Узвышша”, ён шмат працаваў і як перакладчык, і як мовазнаўца, але найболей часу аддаваў паэзіі, у якой стаўся віртуозам і адкрывальнікам новых жанраў. У 1930 годзе, разам з сотнямі беларускіх пісьменнікаў і грамадскіх дзеячаў, быў арыштаваны па выдуманай справе “Саюза вызвалення Беларусі” і высланы за межы Беларусі. Цягам доўгіх дзесяцігоддзяў Дубоўка намагаўся выжыць у лагерах і месцах высылкі, захавацца як асоба і як пісьменнік, адольваючы самыя складаныя перыпетыі сталінскага часу. Да літаратуры ён вярнуўся толькі ў 1950-я, калі пачалася “адліга” і з былых палітычных зняволеных сталі здымаць несправядлівыя абвінавачванні.
У гэты ж час Уладзімір Дубоўка вырашае пісаць для дзяцей: стварае аповесці для малых чытачоў і для падлеткаў, піша казкі, перастварае даўнія сюжэты і прыдумляе свае. У кожнай, нават самай простай, на першы погляд, казцы аўтар закладаў складаную этычную задачу, вырашыць якую належыць самім героям.
Сачыце за абнаўленнямі! Працяг будзе…
