Выдавецтва Gutenberg Publisher анансавала запуск у 2025 годзе новай серыі для дзяцей “Чытаю сабе сам”. З гэтай нагоды адкрыты збор сродкаў на беларускай краўдфандынгавай платформе Gronka.org. Выхад першых кніг серыі чакаецца ў студзені.
Паводле выдавецтва, серыя стваралася для дзяцей, якія толькі пачынаюць чытаць. Усяго мяркуецца выпускасць 3 узроўні кніжак: для чытання па словах, па сказах, па абзацах. У дадатак да кожнай кніжкі чытач атрымае ўзнагароду — дыплом і налепкі. “Прачытаць цэлую кнігу самастойна — гэта не жарты!” — лічаць у выдавецтве.
У першым выпуску — тры кніжкі розных узроўняў.
Алена Зарніцкая “Сябры ў двары” з малюнкамі Дарыны Харытончык.
Андрэй Скурко “Заяц і Мядзведзь едуць да бабулі” з малюнкамі Марыі Платонавай.
Аляксандр Ждановіч (Маляваныч). “Казкі гарадскога парку” ў афармленні Марыі Платонавай.
ПЕРШЫ ЎЗРОВЕНЬ
На гэтым этапе патрэбныя простыя сказы (1-2 на старонку) і займальныя сюжэты. Выдаўцы паставілі націскі і расфарбавалі склады там, дзе іх шмат, каб чытанне давалася лягчэй.
ДРУГІ ЎЗРОВЕНЬ
Цяпер толькі самыя доўгія і складаныя словы падзелены колерам на склады, а на старонцы ўжо адразу некалькі сказаў.
ТРЭЦІ ЎЗРОВЕНЬ
Цяпер дзіця можа самастойна прачытаць цэлую старонку тэксту
Для большай зручнасці ў кнігах серыі выкарыстоўваецца адмысловы шрыфт (EasyReading), распрацаваны для дыслексікаў: літары ў ім лягчэй распазнаюцца і не разбягаюцца. Каб бацькі маглі сачыць за прагрэсам, унутры змешчана эфектыўная бостанская методыка прывучэння да чытання з табліцай для ўліку часу.
“У гэтай серыі будуць толькі беларускія пісьменнікі і мастакі, і мы будзем імкнуцца, каб яны былі розныя. Вельмі хочацца пазнаёміць усіх з таленавітымі аўтарамі і даць кожнаму пляцоўку для самавыражэння. Гэта добра і для дзяцей: розныя стылі будуць развіваць малых. Кожны знойдзе нешта сваё, самае любімае”, – дзеляцца планамі ў выдавецтве.
Больш падрабязна пра праект, аўтараў, мастакоў і тое, як падтрымаць ініцыятыву глядзіце на старонцы Gronka.org.
Ёсць розныя лоты ад 10 еўра.
