Выдавецтва Gutenberg Publisher выдала папяровую версію дапаможніка па псіхалагічным аднаўленні “Белая кніга” ў перакладзе на беларускую мову аўтарства Марыны Літвіненкі, Марты Скугаравай і Веранікі К.
Мэта дапаможніка — памагчы людзям, якія перажылі траўматычныя падзеі. У кнізе сабраныя практычныя рэкамендацыі і тэхнікі, якія дазваляюць справіцца з наступствамі эмацыйных і псіхалагічных траўм.
Марына Літвіненка — гуманістычная тэрапеўтка з 12-гадовай практыкай. “За гэты час я аб’яднала ва ўніверсальны падыход інструменты і філасофію фенаменалагічнага кірунку гештальт-тэрапіі, кагнітыўна-паводзіннай, экзістэнцыяльнай тэрапіі і пазітыўнай псіхалогіі. Таксама я працую ў цялесна-арыентаваным падыходзе. Для мяне галоўная задача і базавая каштоўнасць працы з людзьмі — гэта дасягненне цэласнасці (вылечанасці) усіх частак асобы”, — тлумачыць адна з аўтарак.
Марта Скугарава працуе ў інтэграцыйным падыходзе. Апошнія гады яна рэгулярна вядзе групы падтрымкі для беларусаў і беларусак у Варшаве, дапамагаючы ім прайсці працэс адаптацыі. “Як выявілася, самыя простыя і зразумелыя рэчы аднаўляюць і вылечваюць нас усіх і ўніверсальна працуюць для кожнага — напрыклад, дыханне, сон ці абдымкі. Таму наша простая, сумленная размова адна з адной і з чытачамі стала гаючай і для нас, аўтараў. Мы верым, што вы таксама станеце ўдзельнікамі гэтай размовы, і гэта дапаможа вам перасабраць жыццёвыя сэнсы і здабыць апоры”, — расказвае пра кнігу Марта Скугарава.
Вераніка вывучае філасофію і працуе ў межах экзістэнцыяльна-фенаменалагічнага падыходу: “Як пісаў Карл Густаў Юнг, ‟любая трансфармацыя вымагае «канца свету» — крушэння ранейшай філасофіі жыцця”. У гэтай кнізе мы паспрабавалі перасабраць сябе на абломках таго жыцця, якое нам усім было вядомае да 2019 года. Каб заўважыць, як, нягледзячы ні на што, унутры нас прабіваецца новае жыццё, новае бачанне і ўспрыманне сябе і свайго месца ў зменлівым свеце”.
Папяровая кніга выйдзе 20 сакавіка.
Перадзамовіць “Белую кнігу” можна на сайце выдавецтва gutenbergpublisher.eu.
Кніга падрыхтаваная ініцыятывай “Education Every Day” ў межах праекта Social Camp, які рэалізуецца Гётэ-Інстытутам у Варшаве пры фінансавай падтрымцы Еўрапейскага саюза.
