У выдавецтве “Янушкевіч” выйшаў дэбютны зборнік вершаў маладой аўтаркі Вікторыі Трыфанавай, якая паэзія якой апавядае пра досвед станаўлення асобы ў крызісным часе.
Лірычная гераіня Вікторыі Трыфанавай знаходзіць сябе ва ўмовах маштабных зрухаў і зменаў у свеце. Метасюжэт кнігі ўтвараюць пошукі актуальных сэнсаў у вечных сюжэтах, у магічным гучанні старажытных замоў, у найноўшых трэндах мыслення і мастацтва і, вядома ж, у болю, надзеі, каханні, перажытых самой паэткай.
Аўтарка дзякуе ў сацсетках рэдактарцы Ульяне Верынай, выдавецтву “Янушкевіч”.
“Яшчэ дзякуй Школе маладога літаратара, Вользе Гронскай, Андрэю Хадановічу, часопісу Taubin, фем-архіву “Расцяжэнне” і Тоні Лашдэн за натхненне ў творчасці і ў жыцці”, — пракаментавала выхад кнігі Вікторыя Трыфанава і адзначыла, што кніга напісана на дзвюх мовах — беларускай і рускай — “як і ў жыцці”.
білінгва
жыць на дзве мовы
гэта як жыць на дзве сям’і
мець жонку і палюбоўніцу
адна заўсёды побач і вельмі сур’ёзная
другая падабаецца больш
але з ёю прасцей нецвярозым
разрываешся паміж імі
не хочаш рабіць выбар
аніводную з іх ты не разумееш цалкам
аніводная з іх не будзе ўласна тваёй
ратуе толькі што ты не самотны
у гэтым бясконцым вызначэнні адносінаў
з мовамі і да моў
чытаць нізку вершаў Вікторыі Трыфанавай на taubinpoetry.com
Вікторыя Трыфанава — выпускніца Школы маладога літаратара «W/Rights» (аддзяленне паэзіі і перакладу, 2021), удзельніца лабараторый фем-пісьма «Расцяжэнне» (2022), «Карані/Лісце» (2023). Вершы і пераклады друкаваліся ў часопісах «TAUBIN» (2023), «УЖ» (2022), «Флаги» (2022), «Дзеяслоў» (2021), калектыўных зборніках «Расцяжэнне» (2022), «Карані/Лісце» (2024), зіне «Фігуры замоўчвання» (2023).
