Выдавецтва Skaryna Press выдала зборнік паэта Алеся Дуброўскага-Сарочанкава “Пешшу”. Кнігу будзе можна пагартаць ужывую 15-16 лютага ў Вільні на фестывалі “Вершы на асфальце”.
З анатацыі: “Нібы ў музычнай тэме з варыяцыямі, у кнізе паўтараюцца і вар’іруюцца матывы, вобразы, гукавыя комплексы, нават цэлыя выказванні. Пры гэтым кожны тэкст застаецца самакаштоўнай мастацкай цэласнасцю. Сярод іншых у зборнік увайшлі вершы, адзначаныя прэміяй “Залаты апостраф” як найлепшая паэтычная публікацыя ў часопісе “Дзеяслоў” у 2023 годзе”.
Набыць кнігу “Пешшу” можна праз сайт выдавецтва Skarynapress.com, а таксама на Barnes & Noble і Amazon у розных краінах.
Алесь Дуброўскі-Сарочанкаў (Аляксандр Дуброўскі) — паэт, філолаг, тэолаг. Аўтар кніг паэзіі “Паміж небам і багнаю” (1997), “Эстэтыка маўчання” (2011), “На тонкай нітачцы” (2021),”Літургія часу” (Skaryna Press, 2023), манаграфіі “Паэтыка Рыгора Барадуліна: рытмічная арганізацыя верша” (2006), зборнікаў багаслоўскіх даследаванняў і рэлігійнай публіцыстыкі.
