Культавы дзіцячы раман амерыканскай пісьменніцы Элеанор Портэр “Паліяна” напрыканцы вясны мае выйсці па-беларуску. Пераклаў кнігу Франц Корзун, а ілюстрацыі намалявала Дар’я Заяц.
Гэта класічная гісторыя пра дзяўчынку на імя Паліяна, якая ўмее радавацца ў любых абставінах і вучыць гэтаму цэлы горад. Паводле кнігі знята некалькі фільмаў, напісана мноства сіквелаў, дагэтуль ставяць спектаклі (у 2015 годзе, напрыклад, ішоў беларускамоўны спектакль у менскім Тэатры юнага гледача, пераклад і сцэнічная адаптацыя пяра Артура Вольскага).
Менавіта ад імя гераіні паходзяць словы “паліянізм, паліянаўскі”, якія апісваюць нязменна аптымістычны характар.
