Польскае выдавецтва “Dwie siostry”, якое займаецца літаратурай для дзяцей, пяты раз правяло міжнародны конкурс кніжных праектаў “Jasnowidze” (“Празорцы”). Міжнароднае журы і журы самога выдавецтва адзначыла агулам 6 канкурсантаў, з якіх двойчы беларускую мастачку Марыну Жвірблю.
Сёлета на конкурс было пададзена 554 працы з 55 краін, у тым ліку 357 з Польшчы і 197 з-за мяжы. Прадстаўленыя праекты паказалі ўвесь спектр стыляў, і жанраў ілюстраваных кніг для дзяцей, а іх аўтары парадавалі арганізатараў і журы надзвычайнай крэатыўнасцю.
Праекты ацэньваліся дзвюма незалежнымі камісіямі, якія вызначылі пераможцаў і ўзнагароджвалі дыпломамі.
Паводле міжнароднага журы пераможцам стаў Нікало Вентуры (Nicolò Venturi) з Італіі з працай “The Precious Poop”, а дыпломамі адзначаны беларуска Марына Жвірбля і полька Daria Skolasińska (Дар’я Скалясіньска). Пераможца атрымае грашовую ўзнагароду (2500 еўра)
Журы ад выдавецтва “Dwie siostry” галоўную ўзнагароду прысудзіла Аляксандры Кусьмідэр (Aleksandra Kuśmider) з Польшчы за кнігу “Osobliwe dzienniki z Pewnej Galaktyki“, а дыпломамі адзначыла Марыну Жвірблю, польку Юлію Бардзееўску (Julia Bardziejewska) і Сару Валіневу (Saara Vallineva) з Фінляндыі. Кніга пераможцы мае выйсці ў выдавецтве “Dwie siostry”.
Праект кнігі “Acorns“ (Жалуды) Марыны Жвірблі (падавалася з Літвы) — гэтая вялікая графічная кніга без слоў, якая апавядае пра Мухамор, які вымушаны шукаць новае месца для жыцця на зямлі. Калі дуб, пры якім ён расце, раптоўна ссякаюць, герой у роспачы адпраўляецца ў невядомасць. Пасля доўгага падарожжа ён прыязджае ў Варшаву, дзе змагаецца з адзінотай і пачуццём непрыстасаванасці. Але нарэшце, праз доўгі час, ён зноў пачынае бачыць светлы бок жыцця.
Праект графічнага раману “Жалуды” ўразіў журы нечаканым, але таксама пераканаўчым падыходам да важнай і актуальнай тэмы вымушанай эміграцыі. “Гэтую працу вылучае мноства мастацкіх, графічных якасцяў: здольнасць расказаць гісторыю з дапамогай малюнкаў амаль кінематаграфічным спосабам, вынаходлівая гульню з кампазіцыяй кнігі і трапна знойдзеная форму, заснаваную на выкарыстанні двух колераў: чорнага і чырвонага. Нягледзячы на тое, што кніга закранае сур’ёзную тэму, у ёй хапае гумару — дастаткова прыгадаць Варшаву, выяўленую як горад насякомых, дзе багоўкі і робяць пакупкі ў сетцы супермаркетаў Biedronka. Пытанне, ці будзе змест гэтай гісторыі цалкам зразумелы не толькі дарослай, але і дзіцячай аўдыторыі, застаецца адкрытым, але мы не сумняемся, што гэты праект заслугоўвае прызнання”, — тлумачыць журы выдавецтва сваё рашэнне.
