Перадзамова на калядную гісторыю з Палесся ад Дзеда Янкеля

Выдавец Раман Цымбераў анансуе выхад новай кнігі Дзеда Янкеля (Ігара Гайкевіча) “Як паверыць у Раство, ці Цуд, што адбыўся на Палессі” і адкрывае папярэднюю замову праз сайт kniger.by.

Апісанне кнігі з сацсетак выдавецтва:

“Гісторыя разгортваецца на Палессі, дзесьці паміж Туравам і Лельчыцамі, акурат перад Калядамі, вакол сям’і селяніна Каржа, чый сын Паўлюк цяжка хварэе. Сям’я апынулася ў няпростай сітуацыі: усе пажыткі вытрачаны на лекаванне сына, пазыкі перад жорсткім панам Іеранімам толькі растуць, і той пагражае выгнаць іх з хаты. Маладая сястра хлопчыка, Ганначка, вымушана цягнуць гора сям’і на сваіх маладых плячах, а Ёсіп, які кахае Ганначку (разам з містычнымі істотамі), спрабуе выратаваць Коржаву сям’ю.

У кнізе актыўна выкарыстоўваюцца палескія гаворкі, мясцовыя песні, нават аўтэнтычныя загадкі.
Прысутнічаюць яркія апісанні традыцый (вячоркі, калядныя абрады). Знайшлося месца і фальклорным элементам беларускага Палесся: легендам пра ваўкалакаў, цмока, святыні прыроды”.