Выдавецтва Gutenberg Publisher анансавала выхад новага рамана сёлетняга фіналіста Прэміі Гедройця Аляксандра Карнаўха “Той, хто дае імёны”, які ёсць працягам папярэдняй кнігі “Халодныя землі”.
“Што Сяргей робіць у Нарвегіі, якіх адказаў шукае тут, ля скалы-кафедры, куды людзі прыязджаюць праверыць, наколькі яны жывыя? Летась ён пахаваў жонку. Яна памерла ад хваробы, ніхто яе не забіваў, але патрэбны хаця б не вінаваты – адказны за няшчасце.
Падзеі наслойваюцца на падзеі, і яму, як рэстаўратару, трэба фрагмент за фрагментам адкрываць схаваную выяву. Пакуль яго жывое, моцнае цела робіць крок за крокам, думкі галоўнага героя паволі тонуць у тумане бяспамяцтва. Ці паспее ён знайсці адказы раней, чым забудзецца, навошта іх шукаць? — інтрыгуе анатацыя містычнага рамана з элементамі трылера і дэтэктыва.
Продажы стартуюць 7 лістапада. А цяпер кнігу можна перадзамовіць па зніжаным кошце праз сайт выдавецтва Gutenbergpublisher.eu.
